Estudantado de ESO, bacharelato e universitario puxo a proba este martes as súas capacidades de oratoria e argumentación na fase final do Club de Debate DXP, que tivo como sede o Pazo Provincial da Deputación de Pontevedra. A pregunta de se España debería ou non aumentar o seu gasto militar ata o 5% do PIB foi o eixe temático das diferentes roldas desta competición promovida pola Facultade de Dirección e Xestión Pública, na que aos equipos lles correspondía por sorteo defender unha postura favorable ou contraria a esta idea. Nacida como un proxecto de innovación docente, esta actividade alcanzou na súa cuarta edición o seu maior número de participantes, con seis equipos de diferentes niveis educativos, de entre os que o xurado seleccionou un dos representantes da facultade como gañador final.
Nomeadamente, nesta edición competiu tanto un equipo de primeiro curso do Grao en Dirección e Xestión Pública como outro de terceiro, xunto a estudantes de 4º da ESO do IES A Xunqueira II, alumnado de 1º de Bacharelato do colexio Los Sauces, estudantes do segundo ciclo da ESO do colexio La Esperanza, de Vigo, e estudantado tamén de 4º da ESO do colexio Santiago Apóstol, de Soutomaior. De aí que o decano, Enrique Varela, definise esta actividade como “unha especie de torneo interxeracional”, na súa apertura no salón de plenos do Pazo Provincial, na que estivo acompañado polo vicepresidente da Deputación, Rafael Domínguez. Varela lembrou que a capacidade de “debater, argumentar, defender e refutar” é algo que forma parte “da vida cotiá”, o que levou a lembrar ao alumnado que “o importante non é gañar, senón aprender”, mentres que Domínguez puxo de relevo o valor da capacidade de argumentación en múltiples eidos.
A conmemoración, este sábado 9 de maio, do Día de Europa levou á Facultade de Dirección e Xestión Pública a promover un debate sobre a soberanía da UE nun contexto de transformación dixital. Fíxoo a través do relatorio que o profesor Celso Cancela centrou no concepto de “soberanía dixital” e que levou á súa vez a afondar en cuestións "como a unión política", explicou. A idea central era amosar ao alumnado como “os cambios que se están a producir a nivel tecnolóxico van ter repercusións a nivel social, político e cultural” e debater sobre en que medida a UE “é capaz de tomar decisións” en materia dixital. Isto levou “a falar tamén doutras soberanías, como a industrial ou tecnolóxica”, xerando á súa vez unha reflexión sobre a propia “idea da soberanía en xeral, a unión política e a idea dos Estados Unidos de Europa”.
Este relatorio foi presentado polo coordinador do Grao en Dirección e Xestión Pública, Fernando Martínez, e insírese nas actividades da rede europea ENDE (European Network on Digitalization and E-Gobernance), da que forma parte Cancela. Financiada pola Unión Europea e liderada pola Universidade Tecnolóxica de Tallín, esta rede agrupa especialistas de doce países europeas e ten como obxectivo afondar nas múltiples implicacións da transformación dixital da Unión Europea desde unha perspectiva interdisciplinar.
Ao longo deste cuadrimestre, estudantes de cinco materias da modalidade virtual do Grao en Dirección e Xestión Pública traballaron conxuntamente nun proxecto de innovación docente centrado nos desafíos e oportunidades da intelixencia artificial en dous ámbitos directamente conectados coa súa formación, o da educación universitaria e o político e institucional. Coordinada polo profesor Xosé Mahou, esta iniciativa completouse coa elaboración de dúas guías de uso ético, das que xurdiron á súa vez unha serie de materiais divulgativos, como infografías ou vídeos, reunidas na web presentada na tarde deste mércores, nun acto virtual inserido na Semana DXP.
Coincidindo coa festividade do centro, a facultade promoveu nos últimos dous anos un acto de presentación dos resultados das iniciativas de innovación docente desenvolvidas por estudantes de varias materias do grao. Nas edicións previas, a actividade deu lugar a exposicións sobre Hannah Arendt e San Martiño de Dumio, substituídas desta volta por un acto desenvolvido de xeito virtual, a través de Campus Remoto. Non en van, tratábase dun traballo realizado por estudantes de tres cursos diferentes da modalidade virtual do grao, o que constituíu “todo un reto”, recoñece Mahou. O “obxectivo estratéxico” deste proxecto, sinala, “era que traballaran en equipo e fixeran comunidade”, mentres que desde o punto de vista académico, o propósito desta actividade era “traballar en torno aos desafíos da intelixencia artificial, tanto no ámbito político como no universitario”. Coa participación dos docentes Vitoria Canoura, Ignacio Fernández, Fernando Martínez e Ángela Fernández, tratouse dunha iniciativa na que traballou conxuntamente o alumnado das materias Ciencia Política, Xestión da Documentación Pública, Políticas Públicas, Habilidades das Administracións Públicas e Dirección Pública dos Gobernos Locais.
Seleccionado de entre preto de 70 candidaturas, o estudante da Facultade de Dirección e Xestión Pública Diego Silva foi o único representante español no encontro Youth Voices for the Ocean, que reuniu en Chipre 30 mozos e mozas dos diferentes estados membros da UE, co propósito de coñecer as súas perspectivas sobre o futuro do sector pesqueiro e acuícola, a economía azul e o patrimonio cultural subacuático. Promovido pola Comisión Europea, o propósito deste evento, explica este organismo, é contribuír á inclusión das “perspectivas da mocidade nas iniciativas políticas da Unión Europea, como a Visión 20240 para a pesca e a acuicultura e a Estratexia de Renovación Xeracional Azul, anunciadas no Pacto Europeo dos Océanos”.
En conxunto, este encontro inserido na iniciativa Youth Dialogues recibiu preto de 700 candidaturas, das que preto de 70 correspondían a mozos e mozas españois, sendo Silva Otero o finalmente seleccionado para tomar parte nun evento desenvolvido en Chipre nas últimas semanas. “Foron tres mesas debate nas que se nos presentaban distintos obxectivos e distintos conceptos de política pública e tiñamos que discutir entre todos modificacións desde a perspectiva de como afectan á mocidade”, explica Silva Otero, quen nas últimas horas facía balance desta experiencia nunha reunión co decano, Enrique Varela.
A raíz dunha experiencia de innovación docente que conectaba diferentes materias do grao, a Facultade de Dirección e Xestión Pública impulsaba en 2023 un club de debate que buscaba contribuír ao desenvolvemento da capacidade de argumentación do estudantado de diferentes niveis educativos. Na súa cuarta edición, o Club de Debate DXP amplía o seu número de participantes, coa presenza do alumnado do IES A Xunqueira II e do colegio Los Sauces, de Pontevedra, e cos colexios Esperanza, de Vigo, e Santiago Apóstol, de Soutomaior. Faino ademais adoptando un formato de torneo con diferentes eliminatorias, que terá lugar en maio e que se ve precedidos nestas semanas por actividades formativas nos diferentes centros participantes, así como por un primeiro debate entre dous equipos da facultade. Este tivo xa como eixe a que será a temática desta edición, a argumentación favorable ou contraria a se España debería aumentar o seu gasto militar ata o 5% do PIB.
Este primeiro debate, que como sinala o profesor Ignacio Fernández, coordinador da actividade, non tiña carácter eliminatorio, enfrontou por primeira vez un equipo de estudantes de terceiro curso do Grao en Dirección e Xestión Pública con outro de primeiro. A actividade contou tamén coa presenza de alumnado do Colexio Santiago Apóstol, un dos centros que se incorporan neste 2026 a unha iniciativa que naceu como unha experiencia de innovación docente que implicaba o alumnado de terceiro curso na organización e desenvolvemento dun debate. “Ao ano seguinte decidimos levar esa actividade tamén aos outros centros”, lembrou o decano, Enrique Varela, na apertura un encontro correspondente á “fase intermedia” dun proxecto que adopta nesta ocasión, explicou, "un modelo de torneo”.
Procedentes de dous institutos da cidade, pero chegados tamén desde Rianxo, Lalín, Ourense, Poio e Ponteareas, 341 estudantes de bacharelato puideron coñecer de primeira man a oferta formativa do campus de Pontevedra, ao abeiro das xornadas de portas abertas promovidas pola Vicerreitoría do campus de Pontevedra e a Vicerreitoría de Estudantado e Empregabilidade. Sete centros de ensino sumáronse nesta ocasión a unha iniciativa na que o alumnado dividíase en diferentes grupos para as visitas aos centros segundo os seus ámbitos de interese, sendo Ciencias da Educación e do Deporte a facultade que máis futuros e futuras universitarios congregou nesta xornada.
Previamente, as e os estudantes foron recibidos no edificio que comparten as facultades de Comunicación e Dirección e Xestión Pública, onde a vicerreitora Eva María Lantarón, puxo de relevo as “fortalezas” dun campus "moi próximo á cidade", no que se forman preto de 4400 estudantes e que conta con “titulacións singulares e únicas no panorama autonómico”, como Publicidade e Relacións Públicas, Belas Artes, Deseño e Dirección e Xestión Pública. Como “un escaparate para o campus” definiu Lantarón unhas xornadas que no presente curso leváronse a cabo en dúas quendas. A primeira tivo lugar no mes de febreiro, coa participación de 80 estudantes de Pontevedra e Redondela, mentres que nesta ocasión asistiron alumnas e alumnos dos institutos A Xunqueira I de Pontevedra, Val do Tea de Ponteareas, Ramón María Aller Ulloa de Lalín, Félix Muriel de Rianxo, Universidade Laboral de Ourense e IES de Poio, xunto cun grupo de estudantes do Sánchez Cantón, que se fomrna no Centro Galego de Tecnificación Deportiva (CGTD).